NATO Baş katibindən Rusiyaya xəbərdarlıq

"Rusiya Prezidenti Vladimir Putin sülh sazişindən sonra yenidən Ukraynaya hücum etməyə cəhd edərsə, reaksiyanın dağıdıcı olacağını başa düşməlidir".

Bu barədə NATO-nun Baş katibi Mark Rutte Varşavada jurnalistlərə deyib.

"Təhlükəsizlik zəmanətlərini belə yaradırıq", – deyə Baş katib bildirib.

O eyni zamanda Ukraynanın NATO üzvlüyünə qarşı çıxan ölkələrin adlarını da çəkib.

Mark Rutte bildirib ki, ABŞ, Macarıstan və Slovakiya Ukraynanın NATO-ya daxil olmasını dəstəkləməyəcək. Kiyevin yaxın perspektivdə alyansa dəvət almaq şansı yoxdur.

Onun sözlərinə görə, blok üzvləri arasında yekdilliyin olmaması rəsmi qəbul prosesinə başlamağı qeyri-mümkün edir.

"Ukraynanın üzvlüyü məsələsi həm fundamental, həm də praktikdir. Əsas element ondan ibarətdir ki, avroatlantik regionundakı istənilən ölkənin NATO-ya qoşulmaq niyyəti ola bilər. Praktik məsələ ondan ibarətdir ki, alyansın bir neçə üzvü razılığını bildirməyəcək, bu da Ukraynanın NATO-ya qoşulması ilə bağlı yekdil razılaşma olmamasına səbəb olacaq", – deyə Mark Rutte vurğulayıb.