Pakistan danışıqlarının nəticəsi necə olacaq? - Baku TV

Pakistanın paytaxtı İslamabadda ABŞ və İran təmsilçiləri arasında həm birbaşa, həm də vasitəçilərin iştirakı ilə iki fərqli formatda müzakirələrin baş tutacağı planlaşdırılır.

Bu barədə “Reuters” mənbələrə istinadən məlumat yayıb.

Məlumata əsasən, ilk mərhələdə tərəflər müzakirə olunacaq məsələlərin gündəliyini vasitəçi rolunu oynayan Pakistan rəsmilərinin köməyi ilə razılaşdıracaqlar. Bu mərhələdən sonra nümayəndələr bilavasitə danışıqlara başlayacaqlar.

ABŞ və İran arasındakı bu təmaslar İslamabadda Pakistanın Baş naziri Şahbaz Şərifin vasitəçiliyi altında reallaşacaq. ABŞ tərəfindən heyətə vitse-prezident Ceyms Devid Vens başçılıq edəcək. Heyətin tərkibinə həmçinin Prezident Donald Trampın xüsusi nümayəndəsi Stiv Uitkoff və Cared Kuşner daxildir.

İran heyətində isə ölkənin xarici işlər naziri Abbas Əraqçi və parlament sədri Məhəmməd Baqer Qalibaf yer alır. Bildirilir ki, hər iki ölkənin nümayəndə heyətləri artıq İslamabaddadırlar.

Bu arada ABŞ Prezidenti Donald Tramp danışıqların uğursuz olacağı təqdirdə İrana qarşı zərbələrin yenidən başladılacağını bildirib.

“Biz yenidən yükləmə mərhələsindəyik. Gəmilərimizi indiyə qədər olan ən yaxşı sursatlarla, əvvəllər istifadə etdiklərimizdən də daha yaxşı silahlarla təchiz edirik. Əgər razılıq əldə olunmasa, onları çox effektiv şəkildə tətbiq edəcəyik”, – deyə ABŞ lideri vurğulayıb.