"Ukrayna xalqı buna hazırdır" | Bitmək bilməyən savaş daha 3 il də davam edəcək? - Baku TV

Ukraynada gedən müharibənin başa çatması üçün danışıqların getdiyi bir ərəfədə Ali Radada ölkənin daha 3 il, hətta regional müharibəyə hazır olması ilə bağlı fəaliyyət proqramının müzakirə edildiyi ortaya çıxıb.

Hazırda Qərb mətbuatında yayılan bu xəbərlər Ukrayna ictimaiyyətində emosional müzakirələrə səbəb olub.

Ukrayna Ali Radasının komitə sədri Fedor Venislavski bildirib ki, bu gün müharibənin tez başa çatmasının qiymətləndirilməsində nikbinlik keçən ilin payızında olduğundan xeyli azdır:

“İlk növbədə, problem ABŞ-nin və İsrailin İrana qarşı apardığı müharibədədir. Çünki neftin qiymətinin kəskin artması fonunda Rusiya əlavə gəlir mənbələri əldə edir ki, bu da ona özünü daha inamlı hiss etməyə imkan verir. Əgər Yaxın Şərqdə müharibə və neft qiymətlərinin artımı olmasaydı, bu ilin payızında Rusiyada iqtisadi sahədə artıq çox mənfi dağıdıcı proseslər başlaya bilərdi. Neft qiymətləri onlara müharibəni maliyyələşdirmək üçün daha çox gəlir əldə etməyə imkan verir. Amma əsas problem bu da deyil. Problem ondadır ki, Rusiya Donetsk vilayətinin tamamilə ələ keçirilməsi barədə ultimatum qoyur”.

Qeyd edək ki, Ukrayna Prezidenti Volodimir Zelenski hərbi əməliyyatın daha 3 il davam edəcəyi ehtimalına qarşı Ali Radanın iş planının hazırlanmasını tapşırıb. Ali Radanın uzunmüddətli iş planı Rusiya, ABŞ və Ukrayna arasında aparılan danışıqlar fonunda hazırlanır.