Rəsmi Tehran region dövlətlərinin rolundan bəhs edib - Baku TV

İran xarici işlər naziri Abbas Əraqçi Azərbaycan və 6 region ölkəsinin bölgədə yaranan gərginliyin aradan qaldırılması üçün səylərini yüksək qiymətləndirib, Tehran və Vaşinqton arasında danışıqları təşviq etmək yönündə rollarının önəmli olduğunu vurğulayıb.

IRNA xəbər agentliyinin verdiyi məlumata görə, İran XİN başçısı bildirib ki, region ölkələri ilə məsləhətləşirlər.

Abbas Əraqçi Azərbaycan, Türkiyə, Pakistan, Səudiyyə Ərəbistanı, Birləşmiş Ərəb Əmirlikləri, Qətər və Misir prezidentlərinin İran Prezidenti Məsud Pezeşkianla telefon danışıqlarının olduğunu xatırladıb.

“Region ölkələrinin xarici işlər nazirləri ilə də çoxsaylı telefon danışıqlarım olub və olacaq. Biz region ölkələrinin xoşməramlılığına və səmimi səylərinə hörmətlə yanaşırıq. Bu ölkələrin gərginliyin azaldılmasında, ekstremal tədbirlərin qarşısının alınmasında və tərəfləri danışıqlara təşviq etməkdəki rolları çox təsirli olub. Region dövlətlərinin danışıqları dəstəkləməsi çox yaxşıdır və biz region ölkələri ilə məsləhətləşmələri davam etdirəcəyik”, – deyə Əraqçi qeyd edib.

O, İranın strateji tərəfdaşları olan Çin və Rusiya ilə də məsləhətləşmələri davam etdirdiklərini bildirib.

İranın xarici işlər naziri bəyan edib ki, ölkəsi hətta müharibəyə səbəb olsa belə, uranı zənginləşdirmə hüququnda israr edir.

Bununla belə, nazir vurğulayıb ki, İran diplomatiya və danışıqlara üstünlük verir.

“Əgər onlar diplomatiyanı seçsələr, biz də eyni yolla gedəcəyik. Əgər İran xalqı ilə hörmət dilində danışsalar, biz də hörmət dilində cavab verəcəyik, lakin güc dilində danışsalar, biz də güc dili ilə cavab verəcəyik”, – deyə Əraqçi bildirib.