Ukraynaya göndəriləcək "JWI-4000" Rusiyanın "Shahed"lərini məhv edəcək

Çexiyanın LPP şirkəti Rusiyanın da istifadə etdiyi İran istehsalı “Şahed” PUA-larını ələ keçirmək üçün dron hazırlayıb.

“JWI-4000” dronu “Şahed-136” ilə yanaşı digər pilotsuz uçuş aparatlarını da məhv etmək üçün nəzərdə tutulub. Bu dronların özəlliyi şaquli uçuş funksiyasıdır. Ehtiyac olduqda dronun əlavə sürətləndiricisi işə düşür. Yığcam ölçü, sürət, müasir sensor və süni intellektin quraşdırılması bu pilotsuz uçuş aparatını hücum dronlarının qəniminə çevirə bilər.

PUA-nın döyüş hissəsinin ağırlığı 1,5 kiloqramdır. Maksimum qalxa biləcəyi yüksəklik isə 4 min metrdir. Elektrik mühərrikinin hesabına saatda 300 kilometr sürət yığa bilir.

LPP şirkətinin MTS PUA-ları kimi “JWI-4000” də süni intellektin alqoritmləri ilə idarə olunur, sərbəst hərəkət edir.

Məlumat üçün bildirək ki, bu dronlar yaxın zamanlarda döyüşlərdə istifadə oluna bilər. LPP şirkəti “Şahed”lərin qorxulu yuxusuna çevriləcək dronları Ukraynaya göndərməyi planlaşdırır.