Salyanda 2 ay əvvəl itkin düşmüş şəxsin meyiti tapıldı - Baku TV

Salyanda 2 aya yaxın itkin düşən şəxsin meyiti tapılıb.

Əli bəy Hüseynzadə küçəsində yaşayan 86 yaşlı Rafayət Nəsirovun meyiti Salyan–Neftçala yolunun 6-cı kilometrliyində, Qaraqaşlı kəndi ərazisində yerləşən su kollektorunda aşkarlanıb.

Xatırladaq ki, Rafayət Nəsirov yanvarın 31-də gecə saatlarında yaşadığı evdən çıxaraq naməlum istiqamətə gedib və geri qayıtmayıb. Axtarışlar zamanı onun son görüntülərinin Salyan–Neftçala avtomagistralında quraşdırılan müşahidə kameralarına düşdüyü müəyyən edilib.

Qeyd edək ki, Rafayət Nəsirov uzun illər Neftçala rayonunda sürücü işləyib. Son dövrlərdə isə taksi fəaliyyəti ilə məşğul olub. Onun 4 övladı var.

İlkin məlumata görə, meyitin üzərində hər hansı zorakılıq əlaməti aşkarlanmayıb. Hazırda faktla bağlı aidiyyəti qurumlar tərəfindən araşdırma aparılır.