Sumqayıtda ana xəstə övladından imtina etdi: azyaşlı çox yaşamadı

Aprelin 20-də Sumqayıt Tibb Mərkəzinin nəzdində fəaliyyət göstərən Perinatal Mərkəzdə 1990-cı il təvəllüdlü Aygün Kərimova tərəfindən qeysəriyyə kəsiyi əməliyyatı ilə oğlan uşağı dünyaya gəlib.

TƏBİB-dən verilən məlumata görə, körpəyə yenidoğulmuşlarda hipoksik işemik ensefalopatiya, yenidoğulmuşlarda serebral iflic diaqnozu qoyulub. Ona protokol üzrə yardımlar göstərilib, müalicə və müayinə aparılıb.

Körpənin valideyni (anası) 27.04.2023-cü il tarixində ərizə yazaraq övladından imtina edib. Bununla bağlı tibb müəssisəsi tərəfindən aidiyyəti qurumlara məlumat verilib.

56 gündən sonra isə Uşaq Xəstəxanasına köçürülən körpəyə tibbi personal tərəfindən lazımi qulluqlar edilsə də, onun həyatını xilas etmək mümkün olmayıb.