Neftdə artım, yoxsa azalma? | Dövlət Statistika Komitəsi məlumat yaydı - Baku TV

Bu ilin yanvarında Azərbaycanda 193,4 min ton dizel yanacağı istehsal edilib.

Dövlət Statistika Komitəsinin verdiyi xəbərə görə, bu, 2025-ci ilin yanvar ayının göstəriciləri ilə müqayisədə 14,4% azdır.

Ümumilikdə, hesabat dövründə Azərbaycanda neft məhsullarının istehsalı sahəsində istehsalın ümumi dəyəri 398,3 milyon manat olmaqla, əvvəlki ilin yanvarı ilə müqayisədə 16,4% azalıb.

Ötən ay Azərbaycanda 5,8 min ton mazut istehsal edilib. Bu göstərici 2025-ci il ilin ilk ayı ilə müqayisədə 67,8% azdır.

Yanvar ayı ərzində Azərbaycanda 114,9 min ton həcmində avtomobil benzini istehsal edilib ki, bu da ötən ilin müvafiq dövrü ilə müqayisədə 7,3% azdır. Hesabat dövründə 2,3 min ton sürtkü yağları, 6,9 min ton neft bitumu istehsal edilib.

Ötən ilin yanvar ayı ilə müqayisədə Azərbaycanda sürtkü yağlarının istehsalı 32,4%, neft bitumunun istehsalı isə 65,8% azalıb. Həmçinin hesabat ayında ölkədə 16,8 min ton maye qazlar, 47,5 min ton ağ neft, 19,2 min ton neft koksu istehsal edilib. Son bir ildə Azərbaycanda neft koksunun istehsalı 9,1% artıb, ağ neftin istehsalı isə 22,6% azalıb.

Qeyd edək ki, Azərbaycan Dövlət Neft Şirkətinin Heydər Əliyev adınna Neft Emalı Zavodu regionumuzun yeganə neft emalı müəssisəsi olaraq, Azərbaycanın Ai-92, dizel və təyyarə yanacağı kimi yanacaq məhsulları ilə təmin etməklə yanaşı, SOCAR-ın Azərbaycandakı neft-kimya müəssisələrini də xammal ilə təchiz edir.

Zavodda istehsal edilən məhsulun bir qismi isə ixrac olunur. Zavodun istehsal gücünün artırılması, ölkənin "Avro-5" standartına uyğun olan yüksək keyfiyyətli yanacaqla təmin edilməsi, "Azərikimya" İstehsalat Birliyinin sabit xammal təchizatı və neft məhsullarının ixrac potensialının yüksəldilməsi məqsədi ilə həyata keçirilən modernizasiya və yenidənqurma işləri ölkə sənayesi üçün mühüm əhəmiyyət daşıyır.