İrəvan və Ankara arasında görüş razılığı əldə olundu? - Ermənistan XİN-dən açıqlama
Ermənistan Türkiyə ilə münasibətlərin normallaşdırılması prosesi çərçivəsində əldə olunan bütün razılaşmaların yerinə yetirilməsinə sadiqdir və Ankaradan da bunu gözləyir.
Bu barədə Ermənistan Xarici İşlər Nazirliyinin məlumatında bildirilir. Qeyd edilib ki, hazırda iki ölkənin xüsusi nümayəndələri arasında görüşlə bağlı konkret razılaşmalar yoxdur.
Xarici siyasət idarəsi Ankaradan üçüncü ölkə vətəndaşları və diplomatik pasportu olan şəxslər üçün Ermənistan-Türkiyə quru sərhədinin açılması məsələsində də oxşar hazırlığı gözlədiyini vurğulayıb.
Xatırladaq ki, 2021-ci ilin dekabrında İrəvan və Ankara münasibətlərin normallaşdırılması üzrə danışıqlar üçün xüsusi nümayəndələr təyin edib. 2022-ci ilin iyulunda tərəflər arasında Ermənistan və Türkiyəyə səfər edən üçüncü ölkə vətəndaşlarının Ermənistan-Türkiyə quru sərhədini keçmək imkanlarının təmin edilməsi, habelə yüklərin birbaşa hava daşımalarının həyata keçirilməsi və zəruri proseslərin başlanması barədə razılıq əldə olunub.