Yeni parklar harada yaradılacaq? - Prezident sərəncam imzaladı

Prezident İlham Əliyev Axar-Baxar və İlisu milli parklarının yaradılması haqqında Sərəncam imzalayıb.

Dövlət başçısının imzaladığı sənəddə qeyd olunub ki, Axar-Baxar Milli Parkı Samux, Yevlax və Qax rayonunun dövlət ehtiyat fondu torpaqlarında yaradılacaq. İlisu Milli Parkı isə sərəncama əsasən, Zaqatala və Qax rayonunun dövlət ehtiyat fondu torpaqlarında yaradılacaq.

Sərəncamda bildirilir ki, milli parkların yaradılmasında məqsəd xüsusi mühafizə olunan təbiət əraziləri şəbəkəsinin genişləndirilməsi, biomüxtəlifliyin qorunub saxlanılması, ətraf mühitin dayanıqlı idarə olunması ilə yanaşı, sosial-iqtisadi imkanların artırılması, yerli icmaların ekoloji təşəbbüslərə inteqrasiyası və regionlarda ekoturizmin inkişafını təmin etməkdir.