ABŞ-dən Bakı və İrəvanla bağlı açıqlama

ABŞ Azərbaycan və Ermənistan arasında vasitəçi deyil, bu ölkələrin tərəfdaşıdır.

Bu barədə ABŞ Dövlət Departamentinin sözçüsü Ned Prays jurnalistin Rusiya xarici işlər naziri Sergey Lavrovun Azərbaycanda səfərdə ikən Moskvanın vasitəçilik rolunun əhəmiyyətini vurğulayan açıqlaması ilə bağlı sualına cavab olaraq deyib.

“Bu sual hər iki tərəfə ünvanlanmalıdır. Biz Azərbaycan və Ermənistan arasında vasitəçi deyilik. ABŞ iki ölkənin tərəfdaşıdır. Düşünürəm ki, biz həm sözdə, həm də əməldə iki ölkəni yaxınlaşdırmaq bacarığımızı, bizim Ermənistan və Azərbaycan arasındakı münasibətlərdə irəliləyişə yol açmaq istək və hazırlığımızı nümayiş etdirmişik. Biz bunu iki ölkə arasında uzun müddətdir davam edən mübahisənin və təəssüf ki, martın 5-də də olduğu kimi, insanların həyatına son qoyan mövcud problemlərin həllinə nail olmaq üçün edirik. Məqsədimiz regionda sülh və təhlükəsizliyi təmin etməkdir. Bu, Ermənistan və Azərbaycan xalqlarının da maraqlarına uyğundur”, - deyə o bildirib.

Ned Praysın sözlərinə görə, rəsmi Vaşinqton bunu Moskva ilə rəqabətə girmək məqsədilə etmir.