ABŞ-nin etiraf etdiyi Azərbaycan həqiqəti

Amerika Birləşmiş Ştatlarının İrəvandakı səfiri Kristina Kuin Ermənistanın İctimai Televiziyasına müsahibəsində Qarabağdakı ermənilərin Azərbaycanın tərkibində təhlükəsiz şəkildə yaşaya biləcəklərini deyib.

Xanım səfirin həqiqəti bütün çılpaqlığı ilə Ermənistana elə Ermənistanda təqdim etməsi artıq dünya dövlətlərinin də Azərbaycanın yaratdığı reallıqla barışmasından xəbər verir.

Heç şübhəsiz ki, amerikalı diplomat bu fikirləri səsləndirərkən Azərbaycanın mövqeyini əsas götürüb. Çünki rəsmi Bakı dəfələrlə Qarabağdakı ermənilərin Azərbaycan vətəndaşları olduğunu və bütün hüquqlardan istifadə edə biləcəklərini bəyan edib. Yəni rəsmi Vaşinqton diplomatın dili ilə həm də Azərbaycanın haqlı mövqeyini ifadə edib.

Millət vəkili Elman Nəsirov bildirib ki, ABŞ regionda iki dövlət arasında ədalətli sülhün və təhlükəsizliyin təmin edilməsi ilə bağlı səyləri dəstəkləyir. Onun sözlərinə görə, K.Kuinin səsləndirdiyi fikirlər də məhz həmin mövqeyin ifadəsidir.

Azərbaycan Vətən müharibəsindən sonra bölgədə yeni reallıqlar yaradıb və postmüharibə dövründə sülh və sabitlik Bakının prioritetlərindəndir. Ermənistana havadarlıq edən ölkələr isə Azərbaycana qarşı təzyiq siyasəti aparmağa çalışsalar da, görünən odur ki, artıq yaranan reallıqla barışmağa məcbur olublar.