Araikin istefası və separatçıların başsız qalması nədən xəbər verir?

Azərbaycanın son günlər Qarabağdakı proseslərə nəzarəti artırması, sülhməramlıların komandanlığındakı dəyişiklik və bütün bunların fonunda qondarma rejimin rəhbəri Araik Arutyunyanın dinc əhalinin ona qarşı inamının azalması, həmçinin Azərbaycanla təmaslarda onun bioqrafiyasının yaratdığı problemi əsas gətirərək istefa verməsi separatçıların məğlubiyyətlə barışdıqlarını, dolayısı ilə qondarma rejimdən imtina etdiyini bir daha sübuta yetirir. Çünki çıxılmaz vəziyyət başsız qalan qanunsuz silahlı birləşmələri dalana dirəyib, son nəfəsləri tükənmək üzrədir.

Bəs belə olan halda proseslərin gedişatı nə vəd edir?

Politoloq Tofiq Abbasov bildirib ki, Araik Arutyunyanın istefası onun daxili aləminin, fəryadının bir təzahürüdür. Yəni o bilir ki, komediya qurtarır: “Rusiya da gözəl başa düşür ki, onun da artıq Qarabağda hərbi kontingent saxlamağa nə resursu var, nə də imkanları və eləcə də o kontingent Rusiya üçün Ukrayna istiqamətində çox vacibdir. Bütün bu proseslər 2025-ci ilə qədər, bəlkə də, bir qədər tez həllini tapacaq. Çünki Qarabağdakı muxtariyyət istəyən separatçılar artıq bilirlər ki, oyun bitmək üzrədir və onlar çıxılmaz vəziyyətdədirlər”.

Görünən odur ki, artıq qondarma rejim ətrafındakı böhran özünün kritik mərhələsinə qədəm qoyub. Xankəndidə qarşıdurmaların intensivləşməsi, yerli əhalinin quldur rejimdən cana doyması, Ermənistanın havadarlarının təzyiqlərinə baxmayaraq, Azərbaycanın qəti addımlarla irəliləməsi və bunun fonunda Araikin istefası bu böhranın dərinləşdiyini deməyə əsas verir. Bu isə həm də gələcək perspektivdə separatçıların daxilində xaosun artacağını, dinc əhalinin isə girovluqdan azad olmaq üçün yeni qarşıdurmalara təkan verəcəyini göstərir.

Qarabağdakı ermənilərin yeganə çıxış yolu sələflərinin mənfur siyasətindən əl çəkmək, reinteqrasiya prosesinə töhfə vermək və bu torpaqların əsl sahibini tanımaqdır. Çünki Azərbaycanın hərbi-siyasi qüdrəti erməni faşizminə məğlubiyyətin dadını hər keçən gün daha çox hiss etdirir. Qarşı tərəfin qeyri-adekvat addımları isə alovun üzərinə yanacaq tökməkdən başqa bir şey deyil.