Azərbaycan həqiqətləri İrəvanda etiraf edilir

Ermənistan tarixi həqiqətləri artıq etiraf etməyə başlayıb.

Bu ölkədə tədris olunan “Tarix” dərsliyində Qarabağ Azərbaycanın ərazisi kimi göstərilib.

Görünür, Ermənistan hökuməti tarixi həqiqətləri qəbul etməkdən başqa yol qalmadığını başa düşür.

Çünki illər boyu mədəniyyət abidələrimizlə bağlı tarixi saxtalaşdıran, təhrif edən, ərazilərimizə göz dikən ölkə məhz başına dəmir yumruq dəyəndən sonra yuxudan ayıldı və həqiqətin nə olduğunu başa düşdü. Bir sözlə, hüququn gücünü heçə sayan işğalçı tərəf gücün hüququ ilə barışmaq məcburiyyətində qaldı.

Sirr deyil ki, uzun illər Ermənistanın istər təhsil, istər media, istərsə də ictimai rəyində Azərbaycan və Türkiyə əleyhinə qərəzli siyasət aparılıb. Yeni nəslin beyninə nifrət toxumu səpilib, sülhə yox, düşmənliyə zəmin yaradan addımlar atılıb.

Lakin Ermənistan hakimiyyəti son üç ildə yaxşı başa düşdü ki, Azərbaycanla güc dili ilə danışmaq yox, yaranmış yeni reallıqla barışmaq lazımdır. Çünki bu, rəsmi İrəvanın gələcək sosial rifahı üçün ən əlverişli seçim şansı və yeganə çıxış yoludur.

Təbii ki, Ermənistan regionda sülh və sabitlik istəyirsə, sabotaj xarakterli davranışlarını kənara qoyub, Bakının uzatdığı sülh əlini tutmalıdır. Çünki Azərbaycan qalib dövlətdir və şərtlərini də yaratdığı yeni reallıq fonunda diktə edir. Ona görə də İrəvan proseslərdən nəticə çıxarmalı, havadarlarının fitvasına uymamalı və adekvat addımlar atmalıdır. Çünki sülh və əmin-amanlıq bunu tələb edir.