Azərbaycan kiçik ada dövlətlərinə nə qədər maliyyə dəstəyi ayırdı? | XİN məlumat yaydı

Azərbaycan kiçik ada dövlətlərinə 31 min ABŞ dollarlıq könüllü maliyyə töhfəsi ayırıb.

Bu barədə Xarici İşlər Nazirliyinin 2024-cü ilin yekunlarına dair mətbuat buraxılışında qeyd edilib.

Belə ki, həm milli, həm də qlobal səviyyədə insan hüquqlarının təmin və təşviq edilməsi çərçivəsində Azərbaycan tərəfindən 2024-cü ildə BMT-nin İnsan Hüquqları üzrə Ali Komissarlığına inkişaf etməkdə olan kiçik ada dövlətlərinin, eləcə də ən az inkişaf etmiş dövlətlərin İnsan Hüquqları Şurasında iştirakı, ətraf mühit, həmçinin insan hüquqları proqramları istiqamətlərinə yönləndirilməsi üçün 31 min ABŞ dolları məbləğində könüllü maliyyə töhfəsi verilib.

Bununla yanaşı, Ermənistandan qovulmuş 300 minə yaxın azərbaycanlının hüquqları məsələsi diqqət mərkəzində saxlanılıb.

Qərbi Azərbaycan İcmasının müvafiq müraciətlərinin BMT və digər beynəlxalq platformalarda rəsmi sənədlər kimi yayılması təmin olunub.

Nazir Ceyhun Bayramov BMT Baş Assambleyasında çıxışı zamanı İcmanın hüquqlarının pozulduğunu, dialoqa başlamaq və onların öz yurdlarına təhlükəsiz, ləyaqətli qayıdışlarını təmin etmək üçün dəfələrlə çağırışlarına baxmayaraq, mühüm beynəlxalq aktlarda təsbit olunmuş qayıdış hüquqlarının Ermənistan tərəfindən rədd edildiyi vurğulanıb.