Azərbaycan və 3 ölkənin Fələstin barədə mövqeyi | Problemin həllini kim gecikdirir?

Azərbaycan İslam dünyasında İsrailə ən yaxın ölkələrdən biridir.

Ancaq bu rəsmi Bakının İsrail-Fələstin məsələsindəki mövqeyinə heç bir halda təsir etmir. Bu problemin kökündə dayanan əsas səbəb məhz Fələstin xalqına öz dövlətinin yaradılması üçün imkan tanınmamasıdır.

80 ilə yaxın müddətdə dövlətçilik üçün savaşan bir xalq öz dövlətini onun ərazisini bölən qurumda – BMT-də təsdiq edə bilmir.

Qərb dövlətləri də təşkilatın ədalətsiz idarə edilməsindən istifadə edərək hər dəfə Fələstin dövlətinin tamhüquqlu şəkildə BMT üzvü olması ilə bağlı məsələyə veto qoyur. Onlar bunu belə əsaslandırırlar ki, Fələstin dövlətinin qurulması üçün hələ ki zəmin yoxdur.

Təbii ki, burada İsrail amili ön plana çıxır. Fələstin-İsrail münaqişəsi ilə bağlı bölgədə Misir, Türkiyə və Qətərin daxil olduğu üçlü formatın məsələ ilə bağlı mühüm təklifləri var.

Ankara, Qahirə və Doha münaqişənin dərhal dayandırılması və məsələnin sülh yolu birdəfəlik həlli üçün təkliflərini təqdim edirlər ki, Azərbaycanın hazırda sərgilədiyi mövqe də onlarla üst-üstə düşür.

Bu isə onu göstərir ki, Fələstin məsələsində də Azərbaycan qardaş Türkiyə ilə eyni fikirdədir. Məsələnin həlli üçün ən doğru yol olan ikili dövlət modeli Yaxın Şərqdə əbədi sülhün və əmin-amanlığın bərpası baxımından da önəmlidir.

Əgər Fələstin dövləti yaradılarsa, bu zaman bölgədəki radikal qrupların fəaliyyətinə son qoyulacaq. Eyni zamanda İsraildə öz təhlükəsizliyini təmin etmiş olacaq.

Təəssüf ki, hər iki tərəfdə mövcud olan radikal qruplar buna mane olmağa çalışırlar. İsraildə mövcud olan sağçı siyasilər "Böyük İsrail" dövlətini qurmaq, Fələstin ərazisində formalaşmış bəzi silahlı qruplar isə İsrailin yer üzündən silinməsi ideyasını təbliğ edirlər. Bu cür mövqe isə hər iki tərəf üçün ziyandır.

BMT-də öz hakimiyyətini qurmuş Qərb dövlətləri isə məsələdə birtərəfli mövqe tutaraq İsraili müdafiə edirlər. Türkiyə dəfələrlə BMT-dəki bu ədalətsiz idarəetmənin dəyişdirilməsini təklif edib, Azərbaycan da bu təklifi hər zaman dəstəkləyib. Dövlət başçısının da ifadə etdiyi kimi, Azərbaycanın mövqeyi dəqiqdir. Bütün problemlərə ədalətli yanaşma olmalıdır ki, məsələ həllini tapsın.