Azərbaycan XİN Qızıl Xaç Komitəsinə cavab verdi

Beynəlxalq Qızıl Xaç Komitəsinin humanitar mandatına riayət olunması və ondan siyasi məqsədlər üçün sui-istifadə edilməməsi vacibdir.

Bu fikirlər Azərbaycan Xarici İşlər Nazirliyinin Beynəlxalq Qızıl Xaç Komitəsinin bölgədə humanitar vəziyyət ilə bağlı iyulun 25-də səsləndirdiyi bəyanatına dair şərhində qeyd olunub.

Bildirilib ki, 2023-cü ilin iyunun 15-də “Laçın” sərhəd-buraxılış məntəqəsinin atəşə tutulması, iyulda isə erməni əsilli sürücülərin Beynəlxalq Qızıl Xaç Komitəsinə məxsus nəqliyyat vasitələrində qaçaqmalçılıq məhsullarını Azərbaycana gətirmək səyləri Ermənistan tərəfinin Azərbaycanın ərazi bütövlüyü və suverenliyinə qarşı növbəti qeyri-qanuni fəaliyyət, eləcə də sərhəd-keçid məntəqəsinin fəaliyyətinə maneçilik kimi qiymətləndirilib və rəsmi Bakı bu kimi pozucu tədbirlərə son qoyulmasını tələb edib. Ermənistanın apardığı qeyri-qanuni fəaliyyət cəhdlərinin qarşısını almaqla yanaşı, Azərbaycan tərəfi BQXK ilə vacib əməkdaşlığı davam etdirib.

Xarici İşlər Nazirliyindən bildirilib ki, Azərbaycan tərəfinin komitə ilə apardığı müzakirələrdən sonra zəruri qaydalara riayət etməklə komitə vasitəsilə erməni sakinlərin tibbi məqsədlər üçün sərhəd məntəqəsindən keçidinin davam etməsinə şərait yaradılıb və gün ərzində onlarla erməni sakin hər iki istiqamətdə sərhəd məntəqəsindən keçib.

“Daha böyük miqdarda dərman preparatları və yüklərin daşınması və tədarükü üçün Azərbaycan “Ağdam-Xankəndi” yolundan istifadə etməklə yardım təklif edib. Amma buna rəğmən, təəssüflər olsun ki, erməni tərəfi təkidlə bu yoldan imtina edir”, – deyə nazirliyin məlumatında qeyd olunub.

Bununla yanaşı, erməni sakinlərin tibbi məqsədlər üçün “Laçın” sərhəd-buraxılış məntəqəsindən BQXK vasitəsilə keçidinin daha da asanlaşdırılması məqsədilə komitənin həkiminin əraziyə getməsi ilə bağlı razılıq əldə olunmasına baxmayaraq, yerində bundan imtina olunması da təəssüf doğurur. Erməni tərəfinin Azərbaycanın atdığı addımlara və dəstək niyyətinə, o cümlədən BQXK-nin sözügedən bəyanatda da qeyd etdiyi kimi, “Ağdam-Xankəndi” və digər alternativ yollardan istifadə edilməsi təkliflərinə qarşı çıxması bölgədə “gərgin humanitar vəziyyət” iddialarının siyasi manipulyasiya və təzyiq vasitəsi olduğunu bir daha sübut edir.