Azərbaycanda Milli Dirçəliş Günü qeyd edilir

Noyabrın 17-si Azərbaycanda Milli Dirçəliş Günüdür.

Bu tarix 1988-ci ilin noyabr-dekabr aylarında Bakıda başlayan milli azadlıq hərəkatı ilə bağlıdır.

Həmin vaxt Sovet rəhbərliyinin Qarabağ məsələsi ətrafında apardığı anti-Azərbaycan siyasəti nəticəsində Azərbaycanda antisovet xalq hərəkatı təşəkkül tapıb. 1988-ci ilin 17 noyabrında Bakıda “Azadlıq” meydanında Azərbaycan xalqının uzunmüddətli mitinqləri başlayıb. Milyonlarla insan meydana toplaşaraq Moskvanın anti-Azərbaycan siyasətinə qarşı çıxıb.

1989-cu ilin sentyabrında Ali Sovetin Azərbaycanın suverenliyi haqqında Konstitusiya Aktını qəbul etməsi Moskvanı daha da qıcıqlandırıb və 1990-cı ilin 19-20 yanvarında Bakıya qoşun yeridilib. Mitinqdə iştirak edənlərə qarşı ağır texnika və odlu silahdan istifadə edilib. Yüzlərlə aksiya iştirakçısı və dinc sakin qətlə yetirilib. Amma bu hadisə xalqımızın milli qürurunu sındıra bilməyib. Əksinə, azadlıq hərəkatını daha da sürətləndirib.

1990-cı il noyabrın 17-də Naxçıvan Muxtar Respublikasının Ali Sovetinin yeni tərkibdə ilk sessiyası keçirilib. Muxtar Respublikanın adından “sovet” və “sosialist” sözləri çıxarılıb. İmperiyanın hələ tarix səhnəsindən silinmədiyi bir dövrdə Naxçıvanın adından bu sözlərin çıxarılması müstəqilliyimizin qazanılması yolunda çox böyük tarixi addım idi.

Bununla ümummilli lider Heydər Əliyev milli dövlətçiliyimizin dirçəlişi istiqamətində ilk böyük addımı atıb. Beləliklə, milli dirçəlişdən milli tərəqqiyə doğru uzanan tarixi yolun başlanğıcı qoyulub.

Artıq 4 ildir ki, Milli Dirçəliş Günü Azərbaycanın ərazi bütövlüyünün təmini şəraitində qeyd olunur.

2023-cü il sentyabrın 19-da Qarabağda aparılan və 23 saat davam edən antiterror tədbirləri nəticəsində düşmən ağ bayraq qaldıraraq təslim olub. Bununla da Azərbaycanın bütün ərazilərində Konstitusiya quruluşu bərpa edilib. Hazırda azad olunmuş bütün ərazilər dirçəlir, Qarabağa və Şərqi Zəngəzura həyat qayıdır.