Beynəlxalq Qızıl Xaç Komitəsindən açıqlama

“Laçın yolu ilə humanitar fəaliyyətin dayandırılması Beynəlxalq Qızıl Xaç Komitəsinin öz qərarıdır”.

Bu barədə komitənin Ermənistandakı nümayəndə heyətinin kommunikasiya proqramlarının rəhbəri Zara Amatuni danışıb. Onun sözlərinə görə, problem müəyyən prosedurların aydınlaşdırılmasına görə yaranıb. Qərar qəbul edən tərəflərlə dialoq aparılır.

Komitənin Azərbaycandakı nümayəndəliyinin açıqlamasında bildirilib ki, mayın 17-də Beynəlxalq Qızıl Xaç Komitəsi Laçın-Xankəndi yolu ilə tibb müəssisələri üçün dərman və digər tibbi ləvazimatların çatdırılmasını bərpa edib. Digər əməliyyatların da bərpası ilə bağlı müzakirələr davam edir.

Ermənilər isə iddia edir ki, nəzarət-buraxılış məntəqəsindən humanitar məqsədlər üçün istifadə edilməsinə guya Azərbaycan tərəfi əngəl yaradır. Lakin görüntülərdən də aydın olur ki, Azərbaycan sərhədçiləri humanitar daşınmalara heç bir əngəl törətmir, sənədləri yoxlayaraq nəzarət-buraxılış məntəqəsindən sərbəst keçid üçün şərait yaradır.