Beynəlxalq təşkilatdan Azərbaycana qarşı əsassız iddia

İnsan haqları, xalqların öz müqəddəratını həll etmək hüququ, demokratiya, söz və mətbuat azadlığı, sərbəst toplaşma və s. kimi anlayışlarla öz imperiya maraqlarını qorumaq və genişləndirmək müasir dövrdə böyük dövlətlər üçün yeni istilaçılıq strategiyasına çevrilib.

Bir sıra hallarda özünə rəva bilmədiyini başqa dövlətlərdən tələb etmə halları nəticə etibarı ilə ayrı-ayrı ölkələrdə hərbi-siyasi dağıntılara səbəb olur.

ABŞ-də fəaliyyət göstərən “Human Rights Watch” təşkilatının hesabatlarında özünə yer alan bir sıra məqamlar məhz bu maraqlara xidmət edir. Bu təşkilatın “Azərbaycan: Dağlıq Qarabağda mülkilərin hüquqlarını təmin et” adlı hesabatına ötəri diqqət etdikdə Azərbaycanın dövlətçilik prinsiplərinə qarşı açıq qərəzin nə qədər təhlükəli olduğunu görürük.

Hesabatda olan kobud təhriflər və şişirtmələr adi səhv sayıla bilməz. Ona görə də təşkilatın açıq-aşkar qərəzli və ayrı-seçkili yanaşması onun bütün bu fəaliyyətini tamamilə sual altına alır.

“Human Rights Watch” son hesabatında bir tərəfdən Azərbaycanın Qarabağ bölgəsini tərk etmək istəyən ermənilərə ölkədən çıxmaq üçün şərait yaratmaq tələb edir, digər tərəfdən isə dərhal onların qayıdış hüquqlarını xatırladır.

Təəssüf ki, proseslərə bu qədər həssas yanaşdığını nümayiş etdirməyə çalışan “Human Rights Watch” bir dəfə də olsun azərbaycanlıların Ermənistandan zorla qovulmasına münasibət bildirməyib.

Görünür, təşkilatın siyasi maraqları azərbaycanlıların hüquqlarının qorunmasını özündə əks etdirmir. Halbuki, keçmiş SSRİ-nin süqutu illərində Ermənistanı tərk etmək məcburiyyətində olan azərbaycanlıların köçürülməsi üçün ən sadə insani, məişət şəraiti belə yaradılmayıb, onların mülkiyyət hüququ tanınmayıb, yurd-yuvasından didərgin salınan əhalinin nə vaxtsa öz evlərinə qayıtmasına hesablanmış adi siyasi bəyanat da olsa belə rəsmi İrəvan tərəfindən verilməyib.

Mövcud bariz qərəz və ayrı-seçkilik onu sübut edir ki, “Human Rights Watch” təşkilatının insan hüquqları ilə əlaqəsi yoxdur və bu təşkilat sadəcə müəyyən dairələrin əlində ucuz siyasi vasitə, onun hesabatları isə siyasi sifarişdir.