Bişkekdə ekoloji mövzulara həsr edilmiş konfrans keçirildi | Tədbirdə önəmli məqamlara toxunuldu

Qırğızıstanın paytaxtı Bişkek şəhərində Azərbaycan Gənclər Fondunun maliyyə dəstəyi, “Gəncliyin Sosial İqtisadi İnkişafına Yardım” İctimai Birliyinin təşkilatçılığı ilə “İqlim dəyişikliyində ekoloji böhranın rolu – Qarabağ nümunəsində” adlı Bişkek Konfransı keçirilib. Tədbirdə ekoloji mövzular müzakirə edilib.

“Gəncliyin Sosial İqtisadi İnkişafına Yardım” İctimai Birliyinin sədri Əfsələddin Ağalarov 2024-cü ilin Azərbaycanda “Yaşıl dünya naminə həmrəylik ili” elan olunduğunu və COP29 kimi mötəbər tədbirə ev sahibliyi etdiyini diqqətə çatdırıb.

Daha sonra çıxış edən Azərbaycan Mətbuat Şurasının İdarə Heyətinin üzvü Hacıbəy Heydərli COP29 öncəsi Azərbaycana qarşı dünya mediasında dezinformasiya kampaniyası aparılsa da, heç bir nəticə əldə edilmədiyini vurğulayıb.

“İslahatçı Gənclər” İctimai Birliyinin sədri Fərid Şahbazlı Azərbaycanın “yaşıl iqtisadiyyat”a keçid üçün gördüyü işlərdən danışıb.

Həmçinin “İpək Yolu” təşkilatının sədri Seyfullah Türksoy Azərbaycan və Qırğızıstanın zəngin ekosistemi olduğunu diqqətə çatdırıb.