Bizim üçün dönüm nöqtəsi idi | Türkiyəli Baş konsul çevriliş cəhdindən danışdı

“2016-cı il iyulun 15-də FETÖ terror təşkilatı Türkiyə dövlətinə qarşı çevrilişə cəhd etsə də, hörmətli Prezidentimizin çağırışı ilə türk xalqı küçələrə çıxdı və dövlət qurumlarının da dəstəyi ilə bu xain planın qarşısı alındı. Bu, türk xalqının tarixi üçün dönüş nöqtəsi idi”.

Bunu Türkiyə Respublikasının Naxçıvandakı baş konsulu Asip Kaya bildirib.

O, FETÖ-nün 15 iyul çevriliş cəhdinin qarşısının alınmasını Türkiyənin çağdaş tarixinin dönüş nöqtəsi kimi qiymətləndirib:

“Türk xalqı ilk dəfə bir çevrilişə qarşı bu qədər güclü şəkildə müqavimət göstərdi. Bunun ardınca isə hökumət FETÖ-yə qarşı genişmiqyaslı mübarizəyə başladı”.

“FETÖ sadəcə Türkiyə üçün deyil, mövcud olduğu ölkələr üçün də təhdiddir. Təəssüf ki, bu şəbəkə hələ də bəzi ölkələrdə fəaliyyətini davam etdirir. Amma dövlətimiz dost və qardaş ölkələrin dəstəyi ilə bu mübarizəni xaricdə də davam etdirir. Bir sıra ölkələrdə FETÖ-nün terror təşkilatı kimi tanınmasına nail olmuşuq”, – diplomat qeyd edib.

A.Kaya söyləyib ki, 15 iyul gecəsində Azərbaycan və Türkiyə növbəti dəfə analoqsuz həmrəylik nümayiş etdirib:

“Azərbaycan da bu xain çevriliş cəhdinin ilk anlarından etibarən Türkiyə ilə böyük bir birlik və həmrəylik içində oldu. Cənab İlham Əliyev həmin anda Türkiyəyə dəstəyini ifadə etdi. İndi də bu məsələdə geniş əməkdaşlığımız var. Sadəcə FETÖ-yə qarşı deyil, digər terror təşkilatlarına qarşı da işbirliyi qurulub”.