BMT kürsüsündə erməni yalanları ifşa olundu

1990-cı illərin əvvəllərindən başlayaraq Azərbaycana qarşı 30 ilə yaxın təcavüzü zamanı Ermənistan çoxsaylı hərbi cinayətlər törədib, nəticədə onminlərlə dinc sakin həlak olub, kütləvi etnik təmizləmə aparılıb, yaşayış məntəqələri dağıdılıb və mədəniyyət məhv edilib. Bu vəhşiliklərin miqyasını münaqişə ilə bağlı itkin düşən 4 minə yaxın Azərbaycan vətəndaşı, o cümlədən Ermənistanın taleyinə aydınlıq gətirməkdən çəkindiyi 719 mülki şəxs də sübut edir.

Bu fikirləri Azərbaycanın BMT-dəki Daimi Nümayəndəsi Yaşar Əliyev Nyu-Yorkda İsveçrənin sədrliyi ilə çağırılan Təşkilatın Təhlükəsizlik Şurasının “Silahlı münaqişələrdə mülki əhalinin müdafiəsi” mövzusundakı çıxışı zamanı deyib.

Y.Əliyev bildirib ki, Azərbaycanın mülki əhalisinə qarşı törədilən çoxsaylı vəhşiliklərin günahkarları beynəlxalq hüquqa məhəl qoymadan cəzasız qalıblar. O da vurğulanıb ki, münaqişənin sona çatmasına baxmayaraq, Ermənistan Azərbaycan ərazisində yerləşdirdiyi yüzminlərlə mina haqqında dəqiq və dolğun məlumatları bölüşməkdən imtina edir.

Diplomat Ermənistanın xarici işlər nazirinin müavininin çıxışı zamanı verdiyi yalan bəyanata da aydınlıq gətirib: “Həmin bəyanatda Laçın-Xankəndi yolunun qondarma blokadası, Azərbaycanın Qarabağ iqtisadi rayonunda elektrik enerjisi və təbii qazın kəsilməsi və etnik təmizləmə, “soyqırımı niyyəti” ilə bağlı iddialar açıq-aşkar yalan və təxribat xarakterlidir. Azərbaycan heç vaxt sakinlərin yolda sərbəst hərəkətinə, eləcə də ərzaq, dərman və digər humanitar məqsədlər üçün istifadəsinə, Beynəlxalq Qızıl Xaç Komitəsinin çıxışına əngəl yaratmayıb. Ermənistanın bu kimi yalanlarını ifşa edən çoxsaylı sənədləşdirilmiş sübutlar da təsdiqləyir. Sərhəd-keçid məntəqəsinin yaradılmasına gəlincə, bu, hər hansı digər dövlətin öz sərhədlərini qorumaq və müdafiə etmək, sərhəd nəzarətini qurmaq hüququ kimi Azərbaycanın danılmaz suveren hüququdur. Bu hüquq ərazi suverenliyi və bütövlüyünün təməl prinsiplərinə və Azərbaycanın yol boyu hərəkət edən şəxslərin, nəqliyyat vasitələrinin və yüklərin təhlükəsizliyinə təminat vermək vəzifəsinə əsaslanır. Təhlükəsizlik Şurası dəfələrlə təsdiqləyib ki, ölkələrin sərhədlərinin təhlükəsizliyi üzv dövlətlərin suveren səlahiyyətidir. Ermənistan anlamalıdır ki, dezinformasiya sülh, sabitlik və barışıq məqsədlərini sarsıdır”, – deyə daimi nümayəndə vurğulayıb.