Böyük Azərbaycan Partiyasından prezident seçkiləri ilə bağlı bəyanat

Elşad Musayev İlham Əliyevi təbrik edib. Böyük Azərbaycan Partiyası prezident seçkiləri ilə bağlı bəyanat yayıb.

Bəyanatda deyilir ki, partiyanın sədri Elşad Musayevin namizədliyi təsdiq ediləndən sonra ölkənin 60-dan çox seçki dairəsində imza toplanmasına başlanılıb və uğurla, maneəsiz başa çatdırılıb.

“Aktiv seçki kampaniyasının başlamasından sonra ölkənin bir çox şəhər və rayonunda Elşad Musayevin iştirakı ilə seçicilərlə görüşlər keçirilib. Seçki günü ölkənin bütün seçki məntəqələrində və dairələrində müşahidəçilər əvvəldən sona qədər seçkini müşahidə ediblər və Seçki Qərargahını müşahidə edilən səsəvermə prosesi ilə bağlı məlumatlandırıblar.

Prezidentliyə namizəd Elşad Musayevin birbaşa görüşlər keçirdiyi şəhər və rayonlarda seçicilərin aktivliyi nəzərəçarpacaq qədər böyük olub. Seçki prosesi heç bir kənar müdaxilə olmadan keçirilib və seçki məntəqələrinin ətrafında heç bir polis əməkdaşına və ya hər hansı bir kampaniyaya rast gəlinməyib.

Böyük tarixi sınaqdan, qalibiyyətlə başa vurduğumuz Vətən müharibəsindən sonra keçirilən bu seçkilərdə xalq yenidən öz qalib lideri olan İlham Əliyevə böyük etimad göstərib. Seçkilərin ilkin nəticələrini legitim hesab edir və qələbə münasibətilə İlham Əliyevi səmimi-qəlbdən təbrik edirik, ona çətin fəaliyyətində uğurlar arzulayırıq”, – deyə qeyd olunub.