Bu bölgədə yeni hərbi əməliyyat başlaya bilər

“Müharibə başlasa, Azərbaycan Göyçəni götürəcək. Ermənistan hakimiyyəti və Xankəndidəki Arayik Arutyunyan Qarabağı Azərbaycana təslim etməyə çalışır”.

Bunu erməni politoloq Ara Vardanyan “pastinfo”ya müsahibəsində deyib.

Onun sözlərinə görə, Ermənistan hakimiyyəti və A.Arutyunyan Qarabağın təhvil verilməsi ilə bağlı müxtəlif siyasi fiqurlarla müzakirələrə başlayıb: “Xankəndidə Qarabağın Azərbaycana təhvil verilməsinə razı olan fiqurlar var və onlardan biri də Samvel Babayandır. Onlar artıq bu məsələdə razılığa gəliblər”.

A.Vardanyan onu da bildirib ki, bölgədə yeni hərbi əməliyyatların başlanması təhlükəsi var və bu, istisna deyil.

“İran və Rusiya bu müharibənin olmasını istəmir və buna qarşıdır. Əgər müharibə olarsa, o zaman Azərbaycan Göyçə gölünü götürəcək. Azərbaycan Prezidenti də dəfələrlə deyib ki, Göyçə (Sevan gölü) onlarındır. Üstəlik, Nikol Paşinyan və komandası son vaxtlar su qıtlığından danışmağa başlayıb. İstisna etmirəm ki, gözlənilən hərbi əməliyyatlar Göyçə gölünün ələ keçirilməsi istiqamətində olacaq”, – A.Vardanyan bildirib.