Cənubi Qafqazda “Tramp körpüsü” | Məxfi razılaşma ilə bağlı sensasiyalı iddialar

“Zəngəzur dəhlizi ilə bağlı gizli memorandum təsdiqlənib. Sənəd Cənubi Qafqazda “Tramp körpüsü” layihəsinin reallaşdırılmasını nəzərdə tutur”.

Bu sözlər İspaniyanın “Periodista Digital” qəzetində yayılan məqalədə yer alıb.

Bildirilib ki, sənədin mətni Ermənistan, ABŞ və Azərbaycanda razılaşdırılıb. Uzunluğu 42 kilometr olan bu nəqliyyat dəhlizi Ermənistanın Sünik rayonundan keçəcək. Azərbaycanın digər əraziləri ilə Naxçıvan Muxtar Respublikası arasında quru əlaqəsi yaradılacaq.

Məqalədə qeyd olunub ki, dəhlizdən əldə olunan gəlirlərin 40 faizi ABŞ-nin müvafiq şirkətinə, 30 faizi isə Ermənistana ayrılacaq.

“Memorandumda ABŞ-nin özəl hərbi şirkətinin min nəfər üzvünün Ermənistana ezam olunması da əks olunub. Onlar dəhliz boyunca təhlükəsizliyin təminatı ilə məşğul olacaqlar”, ‒ deyə yazıda qeyd olunub.

Xatırladaq ki, bundan əvvəl də Zəngəzur dəhlizinə ABŞ şirkətinin nəzarət edəcəyinə dair məlumatlar yayılıb. Ermənistanın Baş naziri Nikol Paşinyan isə ABŞ-nin Zəngəzur dəhlizini icarəyə götürəcəyini də istisna etməyib.