Ceyhun Bayramov BQXK-nın prezidenti ilə regiondakı son durumu müzakirə edib

Əldə olunmuş razılıqlara baxmayaraq, Ermənistanın və onun yaratdığı qondarma rejim bu razılıqları kobud şəkildə pozub.

Bu barədə xarici işlər naziri Ceyhun Bayramov İsveçrəyə işgüzar səfəri çərçivəsində Beynəlxalq Qızıl Xaç Komitəsinin prezidenti Miryana Spolyariç Eqqerlə görüşündə bildirib.

Ceyhun Bayramov Azərbaycan qanunvericiliyinə və müvafiq prosedurlara əməl etməklə komitə vasitəsilə erməni sakinlərin ehtiyaclarının qarşılanması üçün Ağdam-Xankəndi və Laçın-Xankəndi yolundan paralel istifadənin zəruriliyini vurğulayıb.

Hazırda “Laçın” yolundan gündəlik əsasda hər iki istiqamətdə erməni sakinlərin keçidinin təmin edildiyi halda Ermənistanın “blokada” iddialarının əsassız olduğu qeyd edilib.

Ümumiyyətlə, Azərbaycan vasitəsilə əraziyə yüklərin daşınmasına maneçilik törədilməsinin siyasi manipulyasiya olduğu, Ermənistanın separatçılığı qızışdırmaq cəhdlərinin tərkib hissəsi olduğu bildirilib.

Görüş zamanı həmçinin 44 günlük müharibədən sonra Ermənistanın “Laçın” yolu vasitəsilə mina və silahların daşınması, hərbi qulluqçuların rotasiyası kimi qanunsuz fəaliyyətləri xatırlanıb.