Ceyhun Bayramovun Aİ-nin xüsusi nümayəndəsi ilə görüşündən mühüm detallar

“Ermənistan Azərbaycana qarşı qarayaxma kampaniyasını dayandırmalıdır”.

Bunu xarici işlər naziri Ceyhun Bayramov Avropa İttifaqının Cənubi Qafqaz üzrə xüsusi nümayəndəsi Toivo Klaarla görüş zamanı deyib.

Tərəflər 2 ölkə arasında sülh sazişi layihəsinin perspektivləri, normallaşma məsələləri, bölgədəki son vəziyyət, Azərbaycanın Qarabağ bölgəsinin yerli erməni əhalisinin reinteqrasiyası istiqamətində atılan addımlar ətrafında fikir mübadiləsi aparıblar. Ceyhun Bayramov Azərbaycan tərəfinin sülh gündəliyi üzrə Avropa İttifaqı da daxil olmaqla beynəlxalq tərəfdaşların vasitəçiliyi ilə həyata keçirilən görüşlərin müsbət nəticələnməsində maraqlı olduğunu, 30 il sonra bölgədə sülh və sabitliyin təmin edilməsi naminə tarixi imkanın yarandığını vurğulayıb. Bu xüsusda Ermənistanın revanşizmə gətirə biləcək açıqlama və bəyanatlar verməsindən, ölkəmizə qarşı apardığı qondarma qarayaxma kampaniyasından çəkinməli olduğunu diqqətə çatdırıb.

Nazir Qarabağın yerli erməni sakinlərinin reinteqrasiyası istiqamətində aparılan işlər barədə qarşı tərəfi məlumatlandırıb, Azərbaycanın yaratdığı elektron portal vasitəsilə yerli erməni sakinlərin qeydiyyatı prosesinin davam etdirildiyini bildirib. Həmçinin erməni sakinlərin Azərbaycan ərazisini tərk etməsinin hər hansı bir məcburi yerdəyişmə ilə əlaqədar olmadığı diqqətə çatdırılıb. BMT rəsmilərinin bölgəyə son səfərləri və səfər sonrası verilən açıqlamaların bunun bariz nümunəsi olduğu qeyd olunub.