Erməni videobloger: Rusiya Qarabağdakı erməniləri hədələyir

Qarabağda müvəqqəti yerləşdirilən Rusiya sülhməramlıları oradakı erməni əhalini hədələyərək onların Nikol Paşinyana qarşı çıxmalarını tələb edirlər.

Bu iddia ilə videomüraciətində erməni bloger Roman Baqdasaryan çıxış edib. R.Baqdasaryanın sözlərinə görə, bu barədə məlumatı ona separatçıların "deputat"ı verib:

“Ötən gün Ermənistanın Baş naziri Nikol Paşinyanın mətbuat konfransından sonra Qarabağdakı Rusiya sülhməramlı kontingenti oradakı erməni deputatlar və hərbçilərlə əlaqə saxlayaraq bildiriblər ki, Paşinyana qarşı informasiya müharibəsinə başlayın və onu satqın adlandırın. Rusiya qətiyyətlə Azərbaycanla Ermənistanın sülh müqaviləsi imzalamasına qarşı çıxır və Qarabağdakı rejimin təmsilçilərinin səsləndirdikləri bəyanatlar da Rusiyanın tələbləridir.

Qeyd edim ki, son 28 ayda Rusiya Qarabağdakı generalların beynini yuyur. Deputat isə konkret bildirir ki, Rusiya son iki ayda oradakı erməniləri qorxudur və sülhdən sonra Azərbaycan Xüsusi Təyinatlı Qüvvələrinin onları həbs edəcəkləri ilə hədələyirlər. Rusiya Qarabağda bu işlərlə məşğuldur”.

R.Baqdasaryanın sözlərinə görə, Rusiya istəyir ki, Ermənistan onun tərkibinə daxil olsun və bunun üçün yeni müharibəyə ehtiyac var.