Ermənistanın növbəti yalanı ifşa edildi

Ermənistan beynəlxalq ictimaiyyəti növbəti dəfə çaşdırmaq məqsədilə yalan məlumat yayır.

Belə ki, Beynəlxalq Qızıl Xaç Komitəsinin Ermənistandakı nümayəndə heyətinin kommunikasiya proqramlarının rəhbəri Zara Amatuni Laçın-Xankəndi yolunda qurulan sərhəd-buraxılış məntəqəsindən Beynəlxalq Qızıl Xaç Komitəsinin avtomobillərinin buraxılmadığını və yayılan videogörüntülərin guya köhnə olduğunu iddia edib.

“Report” öz növbəsində bu gün, 18 may 2023-cü il tarixdə Azərbaycanın Dövlət Sərhəd Xidmətinin bölmələrinin Laçın-Xankəndi yolunun başlanğıcında qurduğu sərhəd-buraxılış məntəqəsi vasitəsilə Beynəlxalq Qızıl Xaç Komitəsinə məxsus təcili tibbi yardım avtomobilinin keçidini əks etdirən görüntüləri təqdim edir. Videodan göründüyü kimi, erməniəsilli şəxslər sərhəd-buraxılış məntəqəsindən heç bir maneə olmadan istifadə edirlər.

Qeyd edək ki, Qarabağdakı separatçılar üçün canlı qüvvə, silah-sursat, mina, eləcə də digər hərbi təyinatlı vasitələrin daşınmasının qarşısının alınması məqsədilə aprelin 23-də Dövlət Sərhəd Xidməti tərəfindən Ermənistanla sərhəddə, Laçın-Xankəndi yolunun başlanğıcında sərhəd-buraxılış məntəqəsi qurulub.