Ermənistanın sərhəddə təxribat törətməyinin məqsədi bu imiş | Deputatdan açıqlama

Aprelin 5-də Brüsseldə Ermənistanın Baş naziri Nikol Paşinyan, Avropa Komissiyasının prezidenti Ursula fon der Leyen və Amerika Birləşmiş Ştatlarının Dövlət katibi Entoni Blinken arasında keçirilən üçtərəfli görüşdən sonra Ermənistan Silahlı Qüvvələri Ordumuzun mövqelərini intensiv atəşə tutmağa başlayıb.

Sülh danışıqlarının gündəmdə olduğu və N.Paşinyanın Qazaxın işğal altında olan 4 kəndini Azərbaycana geri qaytarmaq istəyi ilə bağlı səsləndirdiyi bəyanatlar fonunda rəsmi İrəvanın havadarlarının dəstəyindən həvəslənib təxribatları artırması bu ölkənin sağlam məntiqdə olmadığını, eləcə də sabitlikdə deyil, gərginlikdə maraqlı olduğunu bir daha nümayiş etdirir.

Ermənistanın mütəmadi olaraq silahlanması, şərti sərhədə qoşun yığması və bunun fonunda silahlı təxribatları yenidən artırması Azərbaycana qarşı revanşist ritorikadan hələ də əl çəkmədiyini göstərir. Əslində isə bu, heç də təəccüb doğurmur. Çünki N.Paşinyanın ikibaşlı siyasət həyata keçirdiyi, müxtəlif platformalarda bir-birinə zidd açıqlamalar verib addımlar atması artıq ənənəvi hal alıb.

Elə bunun nəticəsidir ki, normallaşma prosesindən danışan N.Paşinyan administrasiyası bunun əksinə hərəkət edib mənfur planlarını həyata keçirməyə çalışır.

Görünən odur ki, İrəvan Azərbaycanın İkinci Qarabağ müharibəsindən sonra yaratdığı yeni reallıqların qəbul edilməməsi üçün bütün məkrli planlarını işə salıb. Bu isə onu göstərir ki, Ermənistan hakimiyyəti sülh və əmin-amanlıqdan danışsa da, revanşist ritorikadan da əl çəkmək istəmir.

Azərbaycan isə bundan fərqli olaraq bölgədə sabitliyin bərqərar olmasında maraqlıdır və atdığı bütün addımlar beynəlxalq hüquqa əsaslanır. Sülhdən boyun qaçırmaq üçün əlində heç bir bəhanə qalmayan İrəvanın etdiyi bütün təxribatlar isə ilk növbədə özünün zərərinədir.