Fuad Əliyevdən İlham Əliyevə təbrik mesajı

Prezidentliyə namizəd Fuad Əliyevin Seçki Qərargahı seçkilərlə bağlı bəyanat yayıb.

Bəyanatda deyilir ki, Suveren Azərbaycanın Konstitusiyasının və digər qanunvericilik aktlarının, həmçinin ölkədə mövcud olan plüralizm, söz və fikir azadlığının yaratmış olduğu imkanlardan istifadə edən Fuad Əliyev ölkədə keçiriləcək növbəti prezident seçkilərində öz namizədliyini irəli sürüb.

“Seçki günü bütün ölkə ərazisində 6 mindən çox seçki məntəqəsində və 125 dairənin hər birində prezidentliyə namizəd Fuad Əliyevin müşahidəçiləri seçkiləri izləyib və gün ərzində bir neçə dəfə vəziyyətlə bağlı qərargahı məlumatlandırıb. İstər seçki öncəsi prosesdə, istərsə də səsvermə günü müşahidəçilər tərəfindən seçkinin nəticələrinə təsir edə biləcək neqativ hala rast gəlinməyib.

Seçkilərin ilkin nəticəsi onu deməyə əsas verir ki, Azərbaycan xalqı Yeni Azərbaycan Partiyasının namizədi İlham Əliyevə böyük etimad göstərib. Bu qələbə münasibətilə İlham Əliyevi ürəkdən təbrik edir və Prezidentə Azərbaycanın qüvvətlənməsi, insanlarımızın rifahının daha da yaxşılaşdırılması üçün atacağı bütün addımlarda uğurlar arzulayırıq.

Prezidentliyə namizəd Fuad Əliyev üçün səsəverməyə gələn və öz səsini Fuad Əliyevə verən bütün seçicilərə öz dərin minnətdarlığımızı bildiririk”, – deyə qeyd olunub.