Gürcü politoloqlardan Azərbaycana dəstək

Avropa Şurası Parlament Assambleyasının sessiyası zamanı Milli Məclisin nümayəndə heyətinin səlahiyyətlərinin ratifikasiya edilməməsi siyasi qərardır.

Bunu Baku TV-yə verdikləri müsahibələrində gürcüstanlı politoloqlar bildiriblər.

Bakı ilə Tbilisinin hər zaman beynəlxalq tribunalarda tərəfdaşlıq etdiyini qeyd edən gürcü ekspertlər bu məsələdə də Gürcüstanın Azərbaycanın yanında olduğunu vurğulayıblar.

“Azərbaycanla Gürcüstan hər zaman beynəlxalq tribunalarda tərəfdaşlıq edirlər. İki dost ölkə BMT Baş Assambleyasında bir-birilərinin mövqeyini dəstəkləyirlər. Avropa Şurası Parlament Assambleyasında Azərbaycanın üzvlüyünün dayandırılması məsələsində də Gürcüstan öz dəstəyini göstərib.

Cənubi Qafqazda sülhün və sabitliyin təmin edilməsində Azərbaycan böyük rol oynayır. Azərbaycana siyasi təzyiq məqsədilə qəbul edilmiş qərarlar heç nəyi dəyişə bilməz. Bu, heç bir əsası olmadan qəbul edilmiş qərar idi və düşünürəm ki, ən qısa zamanda Azərbaycanın səsvermə hüququ bərpa ediləcək”, – gürcü politoloq Nika Çitadze deyib.

Məlumat üçün bildirək ki, Gürcüstan parlamentinin Avropa Şurası Parlament Assambleyasındakı nümayəndə heyətinin rəhbəri Givi Mikanadze AŞPA sədri Teodoros Rusopulosa məktub ünvanlayıb.

Məktubda Azərbaycana qarşı qəbul edilmiş qərarın AŞPA-nın Azərbaycanla və Cənubi Qafqazla gələcək münasibətləri, eləcə də AŞPA-nın özünün gələcəyi üçün mümkün olan mənfi nəticələr əsaslı şəkildə müzakirə edilmədən və təhlil olunmadan qəbul edildiyi, bunun isə narahatlıq doğurduğu bildirilib.