Gürcüstan illər öncə yaşananlardan necə dərs çıxardı? | Ekspertlərdən şərh

Ukraynanı müharibəyə təhrik etməklə böyük faciələrə yol açan Qərb indi də Cənubi Qafqaz uğrunda yeni mübarizəyə start verib. Bu dəfə isə hədəfdə Gürcüstandır.

Bəs regionda hazırda nə baş verir? Bunun üçün bir qədər geriyə – 2008-ci ilə getməliyik.

Qeyd olunan tarixdə Qərbin vədlərinə arxalanan ovaxtkı Gürcüstan rəhbərliyi mərkəzi hakimiyyətə itaətsizlik nümayiş etdirən Cənubi Osetiya və Abxaziya ilə bağlı problemi güc yolu ilə həll etməyə qərar verib və bu, bütün tərəflər üçün ağır nəticələr verən qanlı müharibəyə gətirib çıxarıb.

8 gün davam edən qanlı döyüşlər nəticəsində əksəriyyəti mülki şəxslər olmaqla yüzlərlə insan həyatını itirib. Ən acınacaqlısı da odur ki, separatçıların başını əzmək niyyəti ilə yola çıxan Gürcüstan Abxaziya və Cənubi Osetiyanın bir hissəsindən tamamilə məhrum olub.

Amma bu gün rəsmi Tbilisi baş verənlərdən özü üçün müvafiq dərs çıxarmış kimi görünür. Gürcü xalqı Qərbin vədlərinin, yardımlarının arxasında özünün maraqlarının dayandığını, gürcü xalqının maraqlarının isə ikinci planda durduğunu anlayıb. Ona görə də hazırkı Gürcüstan hökuməti müstəqil siyasət yürüdür və ilk sıraya ölkənin, gürcü xalqının maraqlarını qoyur. Lakin görünür ki, bu müstəqil siyasət Qərbdəkilərin elə də ürəyindən deyil.

Siyasi şərhçi Züriyyə Qarayeva bildirib ki, bir müddətə qədər Gürcüstan Avropa İttifaqının, Qərbin gözündə ən demokratik dövlətlərdən biri idi:

“Ancaq başqa bir dövr yetişdikdə və Gürcüstanda hakim partiya – “Gürcü Arzusu” partiyası müstəqil xarici siyasət yürütdükdən, geosiyasi reallıqlara adekvat addımlar atmağa başladıqdan sonra Qərbin gözündə demokratik bir dövlət tamamilə əks görüntü yaratmış oldu”.