Hikmət Hacıyev sülhün tək yolunu açıqladı

“Təhlükəsizlik Şurası 1993-cü ildə hərbi işğal konteksti ilə bağlı dörd qətnamə qəbul edib və bu qətnamələrlə Ermənistan qoşunlarının dərhal, qeyd-şərtsiz və tam çıxarılmasını tələb edib. Təəssüf ki, bu qətnamələr kağız üzərində qaldı və yerinə yetirilmədi”.

Bunu Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev “Arab News”a müsahibəsində deyib.

H.Hacıyev eyni zamanda Təhlükəsizlik Şurasının Minsk Qrupunun həmsədrləri olan üzvlərinin bu qətnamələrin tələblərinin yerinə yetirilməsini təmin etmək üçün yetərincə səy göstərmədiklərini də vurğulayıb.

“Amma indi, yəni 30 ildən sonra, təəssüf ki, BMT Təhlükəsizlik Şurası regionumuzdakı məsələləri müzakirə etməyə başlayır. Bəs Təhlükəsizlik Şurasında avqustun 16-da səsləndirilən bəyanatların nəticəsi nədir?

Hesab edirəm ki, onlar müəyyən həddi aşıblar. Amma bununla bağlı hər kəs eyni fikri bölüşür və hesab edir ki, məsələ Vaşinqtonda, Brüsseldə, başqa yerlərdə deyil, yerində həll olunmalıdır. Məsələnin həllinin açarı məhz iki ölkədə - Ermənistan və Azərbaycandadır. Ermənistanla Azərbaycan həll yolu tapmaq üçün bir-biri ilə danışmalıdır”, – deyə o əlavə edib.