Hikmət Hacıyevdən Almaniya nəşrinə tutarlı cavab

Prezidentin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Almaniyanın ZDF nəşrinin təxribat xarakterli suallarını cavablandırıb və rəsmi Bakının mövqeyini aydın şəkildə ortaya qoyub.

Hikmət Hacıyev nəşrin Prezident İlham Əliyevin guya Ermənistanın cənub rayonlarını da Azərbaycanınkı hesab etdiyi və indi həmin əraziləri geri qaytarmaq niyyətində olduğuna dair suallarını cavablandırıb. Azərbaycan Prezidentinin belə söz demədiyini, fikirlərinin yanlış şərh edildiyini diqqətə çatdırıb.

Prezidentin köməkçisi həmçinin Azərbaycanın Ermənistana hərbi zərbə endirmək ehtimalının olmadığını qeyd edib.

“Bizim üçün istənilən hərbi müdaxilə geridə qalıb, çünki Azərbaycan öz ərazi bütövlüyünü bərpa edib”, – deyə o vurğulayıb.

Hikmət Hacıyev Azərbaycanın Avropa Şurası Parlament Assambleyasını tərk etməklə bağlı ehtimallara da aydınlıq gətirib. Vəziyyətin bu həddə çatdığına təəssüf etdiyini, AŞPA-dakı bəzi deputatların digər məsələlərə susduqları halda Azərbaycanı təhqir etdiklərini deyib.

O, AŞPA üzvlərinin seçkilərə dəvət edilməməsinin səbəbindən də danışıb. Vurğulayıb ki, Azərbaycanın AŞPA qarşısında seçkilərə müşahidəçi dəvət etmək öhdəliyi yoxdur.

Prezidentin köməkçisi Azərbaycanda jurnalistlərin həbs olunması ilə bağlı iddiaya da aydınlıq gətirib. Bildirib ki, bəzi KİV-lər Azərbaycandakı fəaliyyətinə görə qanunsuz kanallar vasitəsilə 300 min ABŞ dolları alıblar. Maliyyə mənbələri ilə bağlı şəffaflığı təmin etməyib, əksinə ölkədən kənarda qeyri-qanuni mənbələrdən istifadə etməklə çirkli pulların yuyulması fəaliyyətlərini davam etdiriblər.