Hikmət Hacıyevdən beynəlxalq donorlara cavab

“Ayrı-seçkiliyə, tərəfkeşliyə yol verməyən humanitar reaksiya və yardım insanlığın əsas prinsipi olmalıdır”.

Bunu Azərbaycan Prezidentinin köməkçisi Hikmət Hacıyev sosial şəbəkə hesabında yazıb.

“Beynəlxalq donor ictimaiyyətinin Azərbaycanın Qarabağ bölgəsindən olan, özü də könüllü olaraq Ermənistana getmək qərarına gələn və Ermənistan pasportuna malik olan mülki erməni vətəndaşlarına kömək etməsi müsbət göstəricidir. Bununla belə, Ermənistanın 30 illik işğalı nəticəsində qanlı etnik təmizləməyə məruz qalan bir milyondan çox azərbaycanlı qaçqın və məcburi köçkün donor ictimiyyətinin tam laqeydliyi, ayrı-seçkiliyi və seçici rəftarına məruz qalır. Etnik mənsubiyyətindən, irqindən və dinindən asılı olmayaraq humanitar yardımda bərabər və ayrı-seçkiliyə yol verilməyən rəftar olduqca vacibdir. Yalnız Azərbaycan hökuməti 30 ilə yaxındır ki, milyonlarla məcburi köçkün və qaçqının bütün ehtiyaclarını dəstəkləyir və təmin edir. Bu sahədə biz həm də seçici münasibət və ikili standartlarla üzləşirik. Ermənistan tərəfindən azərbaycanlı qaçqın və məcburi köçkünlərin yerlə-yeksan edilən və kütləvi şəkildə minalanmış evlərinə ləyaqətlə və təhlükəsiz qayıtmasının təmin edilməsi hələ də həll edilməli olan böyük problem olaraq qalır”, – deyə H.Hacıyev sosial şəbəkə hesabında yazıb.