Hikmət Hacıyevdən minalanmış ərazilərlə bağlı açıqlama

Azərbaycanın mülki əhalisi demək olar ki, hər gün Ermənistanın yerləşdirdiyi milyonlarla mina ilə üzləşir.

Bunu Azərbaycan Prezidentinin köməkçisi Hikmət Hacıyev "X" sosial şəbəkəsində yazıb.

“Demək olar ki, hər gün Azərbaycanın mülki əhalisi ölümcül müharibə qalıqları ilə – Ermənistanın yerləşdirdiyi milyonlarla mina ilə üzləşir. Bu gün daha bir mina partlayışı baş verib və ANAMA-nın minatəmizləmə əməliyyatçısı ağır yaralanıb”, – deyə Hikmət Hacıyev bildirib.

Həmçinin qeyd olunub ki, 2020-ci ilin 10 noyabr tarixindən 2024-cü ilin 24 aprel tarixinə kimi 356 Azərbaycan vətəndaşı minadan zərərçəkən kimi qeydə alınıb. Minaya düşənlərin 65-i həlak olub, 291-i isə xəsarət alıb.

Həlak olanların 50-si mülki vətəndaş, 15-i isə hərbçilərdir. Yaralıların 126-sı mülki şəxs, 165-i hərbi qulluqçudur. Ümumilikdə 1991-ci ildən bu günə kimi 3435 nəfər minadan zərərçəkən kimi qeydə alınıb. Onlardan 358 nəfəri uşaqlar, 38 nəfəri qadındır.

Qeyd edək ki, ANAMA-nın əməkdaşı, 43 yaşlı Elçin Quliyev aprelin 27-də Şuşanın Qaybalı kəndində xidməti vəzifəsini yerinə yetirərkən piyada əleyhinə mina partlayışı səbəbindən xəsarət alıb. Ona sağ ayağın amputasiyası diaqnozu qoyularaq yerində ilkin tibbi yardım göstərilib və xəstəxanaya təxliyə olunub. Hazırda vəziyyəti stabildir. Faktla bağlı araşdırma aparılır.