İlham Əliyev müstəqilliyin ilk illərində yaşanan hərc-mərclikdən danışdı

“Azərbaycan cəmi altı il Heydər Əliyevsiz qaldı və bu altı il bizim üçün faciəvi, böhranlı, utancverici illər kimi tarixdə qaldı”.

Bu sözləri Prezident İlham Əliyev oktyabrın 15-də Xankəndi şəhərində Azərbaycan Respublikasının Dövlət Bayrağını ucaltdıqdan sonra çıxış edərkən söyləyib.

Dövlət başçısı müstəqilliyin ilk illərində yaşanan hərc-mərclikdən danışarkən bildirib: “Torpaqlar işğal altına düşdü, bir-birini dəyişən antimilli hökumətlər faktiki olaraq ancaq öz şəxsi maraqlarını qorumağa çalışırdılar, həm sovet dövründə, həm müstəqillik dövründə. Xüsusilə AXC-Müsavat antimilli cütlüyünün xəyanətkar və satqın fəaliyyəti nəticəsində bütün bu boyda ərazi işğal altına düşdü, sonra da qorxaqcasına öz vəzifələrini guya donduraraq kənara çəkildilər”.

“Yenə Heydər Əliyevin dühası, onun siması, Heydər Əliyev amili Azərbaycan xalqının yardımına yetişdi və biz haqlı olaraq Ulu Öndəri xilaskar adlandırırıq. O vaxt Azərbaycanın dövlət müstəqilliyi əldən gedə bilərdi”, – deyə Prezident əlavə edib.