İran-Ermənistan dostluğu zədələnir?

Azərbaycanın 44 günlük Vətən müharibəsində əldə etdiyi qələbə və bölgədə artan nüfuzu İranın regiondakı balans siyasətinə ziddir.

Elə buna görə də “şir” Vətən müharibəsindən sonra sərhədlərin dəyişdirilməsi kimi bəhanələrlə Azərbaycanı sözlü təhdid etməyə çalışıb.

Son 30 illik işğal dövründə İran Ermənistanla dostluq, qardaşlıq siyasəti yürüdüb. Əl altından işğalçıya hər cür dəstək verib.

Yeri gəlmişkən, Ermənistanın Baş naziri Nikol Paşinyan da açıqlamalarının birində Ermənistanın ötən əsrin 90-cı illərində həm də İrana görə yaşaya bildiyini, İranın Ermənistan üçün nəfəslik rolu oynadığını vurğulayıb.

Həmin illərdə Türkiyə və Azərbaycan dənizə çıxışı olmayan Ermənistanla bütün əlaqələri kəsdiyi üçün ermənilərin dünyaya açılan qapısı İran olmuşdu. Bu gün isə iki “qardaş xalq” arasından soyuq küləklər əsir. Çünki Ermənistanın israrla ərazisinə yerləşdirdiyi Avropa missiyası İranı da narahat etməyə başlayıb.

Cənub qonşumuz Ermənistanın sərhədlərində Avropa İttifaqının və ya Qərb dövlətlərinin hərbi kontingentlərinin yerləşdirilməsini öz milli təhlükəsizliyi üçün təhdid hesab edir.

Yanvarın 8-də Azərbaycana səfər edən İranın Ali Milli Təhlükəsizlik şurasının katibi Əli Əkbər Əhmədian bununla bağlı üstüörtülü açıqlama da verib.

O bildirib ki, xarici qüvvələrin regiona cəlb edilməsi qəbuledilməzdir. Ardınca İrəvana səfər edən cənab Əli Əkbər Əhmədianın erməni həmkarı Armen Qriqoryana sözügedən məsələ ilə bağlı narahatlığını bildirdiyi iddia olunub. Hətta missiyanın bölgədən uzaqlaşdırılmalı olduğu xəbərdarlığını etdiyi də deyilib.

Maraqlıdır ki, bu məsələdə İran və Azərbaycanın mövqeyi üst-üstə düşür. Azərbaycan da bölgədə Avropa hərbi kontingentlərinin yerləşdirilməsinə qarşıdır, çünki bu, regionda əlavə gərginlik və qeyri-sabitlik yarada bilər.

Bəs Ermənistanın bu məsələyə reaksiyası necə olacaq? Bir tərəfdən Rusiyadan qoparaq Qərbə yaxınlaşmaq meyili, Avropa missiyasının bölgəyə ayaq açmasına imkan yaratması kimi addımları İranla olan münasibətlərinə necə təsir edəcək?