İsaak Hersoq ilə Netanyahu Azərbaycan liderini və xalqını təbrik edib

“Prezident Donald Trampı təbrik edirik. Sizin cəsarətli rəhbərliyiniz və qlobal baxışınız daha bir sülh sazişini mümkün edib”.

Bu barədə İsrailin Baş naziri Benyamin Netanyahu “X” sosial şəbəkə hesabında yazıb.

“Mən bu tarixi sazişin imzalanması münasibətilə Azərbaycan Prezidenti İlham Əliyevi, Ermənistanın Baş naziri Nikol Paşinyanı, Azərbaycan və Ermənistan xalqlarını təbrik edirəm. Hamınız barışıq və ortaq rifahın yeni dövründən zövq alın”, − deyə Baş nazir bildirib.

Eyni zamanda İsrail Prezidenti İsaak Hersoq da məsələyə münasibət bildirib.

“Vaşinqtonda Donald Trampın himayəsi altında Azərbaycan və Ermənistan arasında tarixi sazişin imzalanmasını görəndə dərindən təsirləndim. Ümid və dua edirəm ki, biz sizin rəhbərliyiniz altında dünyada, hər şeydən əvvəl Qəzzada girovlarımızın təcili geri qaytarılması kimi daha çox tarixi nailiyyətlər görəcəyik”, − deyə İ.Hersoq “X” sosial şəbəkəsində paylaşım edib.

O, Prezident İlham Əliyevi və Baş nazir Nikol Paşinyanı, həmçinin Azərbaycan və Ermənistan xalqlarını təbrik edib, sülh, əmin-amanlıq və firavanlıq arzu edib.