İtaliya rəsmisi Azərbaycan-Ermənistan münasibətlərini şərh edib

“Azərbaycan müsəlman dünyasının ən dünyəvi və tolerant ölkələrindən biridir. Odur ki, dindən xalqlar arasında münaqişə elementi kimi istifadə edilməməlidir”.

Bu sözləri İtaliyanın xarici işlər nazirinin müavini Edmondo Çirielli İtaliya mətbuatına verdiyi müsahibədə söyləyib.

O, Rusiya-Ukrayna və Azərbaycan-Ermənistan münasibətlərində müqayisələr aparıb və bildirib ki, Ermənistan Qızıl Ordunun dəstəyi ilə Qarabağı, eləcə də yalnız azərbaycanlıların yaşadığı digər bufer zonanı işğal edib.

“Rusiya Ukraynada ayrı-seçkiliyə məruz qalan rusları qorumaq iddiası ilə bu ölkədə müharibə aparır. İtaliyanın hazırkı hökuməti Ukraynaya hərbi yardım edir. Biz Ukraynanı dəstəklədiyimiz halda Ermənistanı necə dəstəkləyə bilərdik? Əlbəttə ki, sırf dini faktı əsas tutub bunu edə bilməzdik, çünki bu, kobud səhv olardı”, – deyə italiyalı nazir müavini vurğulayıb.

Bakı-İrəvan əlaqələrində İtaliyanın diplomatik roluna gəldikdə isə Edmondo Çirielli ölkəsinin bu işdə mühüm rol oynaya biləcəyinə dair əminliyini ifadə edib. Bildirib ki, Azərbaycanın Ermənistana qarşı güc tətbiq edən dövlət kimi göstərilməsi sülhə töhfə verə bilməz.

O, bu mövzuda Gürcüstanın sərgilədiyi münasibəti uğurlu qiymətləndirib və deyib ki, xristian ölkəsi olmasına baxmayaraq, Gürcüstan Azərbaycan üçün imtiyazlı tərəfdaşdır. İtaliya kimi ciddi vasitəçilik potensialına malikdir, həmişə Azərbaycanın hüquqi və beynəlxalq maraqlarını müdafiə edib.

Sonda onu da əlavə edib ki, beynəlxalq hüququn və BMT prinsiplərinin müdafiəçisi olan İtaliyanın bu siyasi xətti dəstəkləməməsi qəribə görünərdi.