İtaliyalı nazir müavini Azərbaycanın haqq savaşından danışdı

İtaliyanın xarici işlər nazirinin Qafqaz üzrə məsul müavini Edmondo Çirielli İtaliyann nüfuzlu kütləvi informasiya vasitələrindən olan “Formiche.net” xəbər portalına müsahibə verib.

O, Avropa Parlamentinin üzvü, İtaliyanın “Beş Ulduz hərəkatı” müxalifət partiyasının deputatı Fabio Massimo Kastaldonun Avropa Parlamentində Azərbaycan əleyhinə səsləndirdiyi qərəzli, ədalətsiz və əsassız çıxışları pisləyərək bu cür münasibətin indiyədək əldə olunan sülh razılaşmalarına xələl gətirdiyini qeyd edib.

Həmçinin Avropa və İtaliyanın Azərbaycan və Ermənistan arasında yumşalma mühiti yaratmaq üçün çalışmalı olduğunu vurğulayıb.

Bundan əlavə, italiyalı nazir müavini Avropa Parlamenti deputatının Azərbaycanın Qarabağda keçirdiyi antiterror tədbirlərini guya “azərbaycanlıların hücumu” kimi qiymətləndirməsi fikrini dəlilik adlandırıb.

“Azərbaycan heç vaxt Ermənistan ərazisinə qarşı hücum həyata keçirməyib. Azərbaycan Ordusu ermənilərin Qarabağı tərk etməsi üçün təhrikedici heç bir addım atmayıb. Əksinə, bütün bu addımları atanlar separatçılar idi və bununla əlavə gərginlik yaratmaq istəyirdilər”, – deyə E.Çirielli bildirib.

Nazir müavini həmçinin illərlə Rusiyaya yaxın olan Ermənistanın indi xarici güclərin təzyiqi ilə Qərbə yaxınlaşmaq istəyini də şərh edib və söyləyib ki, İkinci Qarabağ müharibəsindəki qələbədən sonra Azərbaycan həm də bölgədə sülhün təşəbbüskarı olub.

Rəsmi Bakı son üç ildə münasibətləri sülh yolu ilə nizamlamağa çalışır. Lakin bəzi Qərb dairələri erməni revanşizmini və erməni millətçiliyini qızışdıraraq beynəlxalq hüquqda belə nəzərdə tutulmayan məsələlərdə İrəvanı Bakının sülh çağırışlarından yayındırmağa çalışır.

Edmondo Çiriellinin sözlərinə görə, heç bir dövlət işğal problemini danışıqlar yolu ilə həll etmək üçün bu qədər gözləməzdi. Ermənistan tərəfindən aparılmış və 30 il davam etmiş münaqişə beynəlxalq hüququn açıq şəkildə pozulmasıdır. Ermənistan rəhbərliyinin düşüncəsizliyi nəticəsində Azərbaycan BMT qətnamələrini güc yolu ilə icra etməyə məcbur oldu.