Korotçenko Azərbaycanın siyasətindən danışdı | Vaşinqton Bakını şantaj etmək istədi, amma...

“Bu gün Azərbaycan beynəlxalq münasibətlərdə məsuliyyətli iştirakçı kimi mövqe tutur. Bu, ilk növbədə Cənubi Qafqazda baş verən son hadisələr fonunda geosiyasi çəkisini kəskin şəkildə artıran ölkədir. Azərbaycanda irimiqyaslı enerji və infrastruktur layihələri həyata keçirilir”.

Bunu rusiyalı politoloq İqor Korotçenko “Moskva-Bakı”ya müsahibəsində Azərbaycanın BRICS-də perspektivləri barədə danışarkən deyib.

O bildirib ki, müasir nəqliyyat logistikası sisteminə əsaslanan Azərbaycan təkcə Cənubi Qafqazda deyil, bütün Avrasiyada ən mühüm geoiqtisadi oyunçudur:

“Bu səbəb və şərait nəticəsində Azərbaycanın siyasi, iqtisadi, hərbi statusu və çəkisi xeyli artıb. Bunu bu gün hamı tanıyır. Ən əsası isə Azərbaycan milli maraqların müdafiəsinə yönələn suveren siyasət yürüdür. Həmin ABŞ Azərbaycana təzyiq göstərməyə, şantaj etməyə çalışdı, amma heç nə alınmadı.

Bu, Cozef Baydenin Prezident İlham Əliyevə xüsusi müraciət yazması və onu Ermənistanla sülh müqaviləsinin tezliklə imzalanmasına inandırması ilə başa çatıb. Təbii ki, Azərbaycan belə bir sazişi o zaman bağlayacaq ki, o, tam hazır olsun, sülh və sabitlik maraqlarına cavab versin, nəinki Amerikanın istədiyinə”.

İ.Korotçenkonun sözlərinə görə, BRICS sammitindəki çıxışı ilə İlham Əliyev müasir dünyanın aparıcı siyasi liderlərindən biri olduğunu göstərib:

“Güclü, özünə güvənən, strateji məqsəd qoyan, böyük intellektual! O, bu gün çoxlarının öz dövlətinin başında olmasını arzuladığı liderdir, o cümlədən Avropa Birliyinin bir çox ölkələri bunu arzulayır.

Azərbaycan bu gün Cənubi Qafqazda açıq-aşkar dominantlıq edir. İ.Əliyev təkcə dövrün tendensiyalarını hiss etmir, həm də öz regionunda və onun hüdudlarından kənarda daha çox müasir siyasəti formalaşdırır. Azərbaycan bu gün obyektiv olaraq bu regionun taleyi üçün məsuliyyət daşıyır”.