Milli Məclisdən Hökumətə çağırış | Sanksiyalar tətbiq edilsin!

Fransada fəaliyyət göstərən erməni lobbisi rəhbərlərinin və onların təsiri altında olan Fransa rəsmilərinin və siyasətçilərinin təhriki ilə Fransa Senatının yanvarın 17-də qəbul etdiyi qərəzli, birtərəfli və əsassız qətnamə ilə əlaqədar Milli Məclisin Beynəlxalq münasibətlər və parlamentlərarası əlaqələr komitəsi bəyanat qəbul edib.

Bildirilib ki, son illərdə Fransanın siyasi dairələri, o cümlədən Senatı və Milli Assambleyası birbaşa Yelisey Sarayından alınan təlimat əsasında açıq irqçi, Azərbaycanofob və islamofob fəaliyyətini daha da intensivləşdirib və beynəlxalq hüquq normalarına, prinsiplərinə açıq hörmətsizlik nümayiş etdirərək Azərbaycanın ərazi bütövlüyünə və suverenliyinə qarşı ədalətsiz addımlar atmaqda davam edir.

Bəyanatda Fransanın Azərbaycana qarşı uğursuz kəşfiyyat işi ilə bağlı məsələ də yada salınır. Bildirilib ki, bu ölkənin Azərbaycandakı səfirliyinin iki əməkdaşı diplomatik statuslarına uyğun olmayan, Vyana Konvensiyası ilə ziddiyyət təşkil edən fəaliyyətə görə Azərbaycan hökuməti tərəfindən arzuolunmaz şəxs elan olunaraq ölkə ərazisindən çıxarılıb.

Bildirilib ki, dünyanın müxtəlif bölgələrində 50-dən artıq dövlətin ərazisini işğal etmiş, sərvətlərini talamış, xalqlarını uzun illər əsarətdə saxlamış Fransanın törətdiyi vəhşiliklər, insanlıq əleyhinə müharibə cinayətləri bəşər tarixinin qara səhifələridir. Müstəmləkə illərində soyqırımı cinayətləri Fransanın siyasi tarixində silinməsi mümkün olmayan ləkədir.

Rəsmi Bakı Fransanı vəhşiliklər törətdiyi xalqlardan üzr istəməyə, həmçinin təbii sərvətlərini talan etdiyi dövlətlərə kompensasiya ödəməyə çağırır.

Milli Məclisin Beynəlxalq münasibətlər və parlamentlərarası əlaqələr komitəsi Fransanın davamlı anti-Azərbaycan fəaliyyətini nəzərə alaraq Azərbaycan Hökumətinə rəsmi Parisə qarşı sanksiyalar tətbiq edilməsi, Fransa rəsmilərinin Azərbaycanda hər hansı aktivlərinin aşkar edildikdə dondurulması, Fransa ilə bütün iqtisadi əlaqələrin dayandırılması, “Total” da daxil olmaqla bütün Fransa şirkətlərinin Azərbaycandan çıxarılması, Fransa şirkətlərinin Azərbaycanın sifarişi ilə həyata keçirilən hər hansı layihədə iştirakına yol verilməməsi barədə çağırış edib.