Ordumuz müdafiə xəttini yarıb: Hikmət Hacıyevdən seperatçılara mesaj

Azərbaycan Ordusu Qarabağ bölgəsinin bir neçə yerində qanunsuz erməni qüvvələrinin müdafiə xəttini yarıb və strateji məqsədlərini həyata keçirmək əzmindədir.

Bu barədə Prezidentin köməkçisi Hikmət Hacıyev “Reuters”ə açıqlamasında bildirib. Onun sözlərinə görə, Bakı yalnız tərk-silah edilmiş Qarabağ erməniləri ilə danışmağa hazırdır.

O xatırladıb ki, Azərbaycanın qonşu Ermənistanda heç bir hərbi hədəfi yoxdur.

“Azərbaycanın niyyəti düşmənçilik və qarşıdurma səhifəsini bağlamaqdır. Yetər. Biz artıq öz ərazimizdə bu cür silahlı qüvvələrin, eləcə də Azərbaycanın təhlükəsizliyinə və suverenliyinə hər gün meydan oxuyan strukturun olmasına daha dözə bilmərik”, – deyə Prezidentin köməkçisi vurğulayıb.

“Bakı antiterror əməliyyatları ilə strateji hədəfinə - öz ərazisi üzərində suverenliyini təmin etməyə - nail olacağına inanır”, – deyə diplomat həmçinin qeyd edib.