Pakistanın Bakıdakı səfiri Azərbaycanla əməkdaşlıqdan danışdı

“Cari ildə Azərbaycanla Pakistan arasında baş tutacaq qarşılıqlı yüksək səviyyəli səfərlər ikitərəfli münasibətlərin əsas göstəricisidir. Bu, əslində, aramızdakı əlaqələrin yüksək səviyyədə olduğunu göstərir”.

Bunu açıqlamasında Pakistanın Azərbaycandakı səfiri Qasım Mohiuddin deyib.

O qeyd edib ki, Pakistanın Baş naziri Məhəmməd Şahbaz Şərif Azərbaycan Prezidenti İlham Əliyevi yenidən Pakistana səfərə dəvət edib.

“Bizim çoxillik dostluq, etimad və qardaşlıq tariximiz var və demək olar ki, hər sahədə əməkdaşlıq edirik. İqtisadi sahədə ticarət investisiyalarına, enerjiyə qədər bir çox sahədə. Birgə investisiyalar üçün nəzərdə tutulan bir neçə layihəmiz var və onları tezliklə elan edəcəyik. Ən yüksək səviyyəli qarşılıqlı əlaqə, əslində, bizim sıx əməkdaşlığımızın əlamətidir”, – deyə o bildirib.

Səfir həmçinin Prezident İlham Əliyevin Pakistana səfərini səbirsizliklə gözlədiklərini bildirib. “Pakistan onun evidir, nə zaman istəsə, səfər edə bilər”, – deyə Qasım Mohiuddin əlavə edib.