Paşinyan Azərbaycanla bağlı səhvlərindən danışdı | “Bunu daha əvvəl etməli idim...”

“2022-ci ilin 6 oktyabrında Ermənistanın Baş naziri kimi mən Ermənistanın ərazi bütövlüyünü tanıdım. Həmin hadisə ilə bağlı elə bir ritorika yayılıb ki, Nikol Paşinyan Azərbaycanın ərazi bütövlüyünü tanıyıb. Yəni Qarabağ da Azərbaycana aiddir”.

Bu barədə Ermənistanın Baş naziri Nikol Paşinyan mətbuat konfransında bildirib.

O əlavə edib ki, bu olanların tam obyektiv hissəsi deyil.

“Çünki mən sentyabr hadisələrində də Kollektiv Təhlükəsizlik Müqaviləsi Təşkilatına müraciət etmişdim. Cavab gəldi ki, Ermənistan sərhədi KTMT-nin qırmızı xəttidir. Aydın oldu ki, KTMT-dəki həmkarlarımız Qarabağı bizim ərazimiz saymır. Bax onda anladıq ki, qonşu ölkələrin ərazi bütövlüyünü tanımasaq, bizim də ərazi bütövlüyümüzü tanımayacaqlar”, – deyən N.Paşinyan Azərbaycanla bağlı bəzi səhvlərindən də danışıb.

“Azərbaycanın ərazi bütövlüyünü daha əvvəl tanımalıydım, bu mənim səhvimdir. Amma səhvimin sosial-psixoloji səbəbləri var idi”, – sözlərindən sonra N.Paşinyan əsas günahı Serj Sarkisyan və onun sələflərində görüb.