Prezident: ABŞ ilə əlaqələrimizi genişləndirmək əzmindəyik
Prezident İlham Əliyev ABŞ Prezidenti Cozef Baydeni ölkənin milli bayramı – Müstəqillik Günü münasibətilə təbrik edib.
Təbrik məktubunda bildirilib ki, Azərbaycanla ABŞ arasında əlaqələr dostluq və əməkdaşlıq zəminində dinamik inkişaf edərək bir sıra sahələrdə strateji tərəfdaşlıq səviyyəsinə yüksəlib. Qlobal çağırışlara, beynəlxalq terrorizmə qarşı mübarizə, təhlükəsizlik məsələlərində fəal və səmərəli birgə iş, iqtisadi sahədə geniş spektrdə qarşılıqlı fəaliyyət ikitərəfli münasibətləri səciyyələndirən başlıca amillərdəndir.
Dövlət başçısı bildirib ki, ölkələrimiz arasında enerji sahəsindəki əhəmiyyətli əməkdaşlıq məmnunluq doğurur. ABŞ Azərbaycanın enerji strategiyasını bütün mərhələlərdə qətiyyətlə və davamlı şəkildə dəstəkləyib.
“Hazırda Cənubi Qafqazda davamlı sülhün bərqərar olması üçün əlverişli şərait formalaşıb. Ermənistan-Azərbaycan münasibətlərinin normallaşdırılmasında, beynəlxalq hüququn norma və prinsipləri əsasında sülh müqaviləsinin hazırlanması prosesində ABŞ-nin səylərini yüksək qiymətləndiririk.
Bu gün biz bir sıra sahələrdə qarşılıqlı fəaliyyətimizin böyük potensialından yararlanaraq ABŞ ilə əlaqələrimizi daha da genişləndirmək əzmindəyik. Əminəm ki, qarşılıqlı etimad və dəstəyə əsaslanan Azərbaycan-ABŞ tərəfdaşlığının inkişafı və möhkəmləndirilməsi yolunda birgə səylərimizi dövlətlərimizin maraqları və xalqlarımızın mənafeyi naminə bundan sonra da ardıcıl şəkildə davam etdirəcəyik”, – deyə təbrik məktubunda qeyd olunub.