Qarabağın qızılı ilə varlanan ermənilər ifşa edildi

Erməni separatçıların yalanlarını ifşa etməklə məşhur olar bloger Roman Baqdasaryan sosial şəbəkədə etdiyi canlı yayım zamanı Azərbaycan torpaqlarının işğalı dövründə separatçıların orada törətdikləri ekoloji cinayətlərdən danışıb.

Sualları cavablandıran bloger belə bir sualla çıxış edib: “34 il ərzində keçmiş Ermənistan hakimiyyəti və separatçıların Qarabağda qızıl oğurladığı bir vaxtda niyə hədələyici yazılar yazmırdınız?”

Fəal həmçinin Qarabağda kəndləri, şəhərləri viran qoyan, Azərbaycanın sərvətini talayan, eləcə də öz xalqını fəlakətlərə sürükləyən erməni məmur-oliqarxları, ordu zabitlərini tənqid edib:

“Mən bunu xüsusi olaraq qeyd etmək istəyirəm. Ötən əsrin 90-cı illərinin sonundan etibarən Qarabağda çoxlu sayda mədənlər aşkar edilib, külli miqdarda qızıl çıxarılıb. Bunu Qarabağda yaşayan bütün ermənilər çox gözəl bilirlər. Kəlbəcər rayonunda və digər ərazilərdə çoxlu qızıl oğurlanıb. Bu barədə bu günə qədər heç kim yazmır. Bəs necə olur, 34 ildir ki, siz öz oğullarınızı, atalarınızı cəbhəyə göndərirsiniz ki, separatçılar rahat şəkildə qızıl çıxarsınlar? Robert Koçaryan, Bako Saakyan və ya digərləri Qarabağdan apardıqları qızıllarla özlərinə möhtəşəm yaşayış qurublar. Onlardan kimsə gətirib bir dəfə sizə 5 qram qızıl verib? Kimsə gəlib sizə deyib ki, ana, sən övladını döyüşdə itirmisən, al boyunbağı sənin olsun? Axı sənin övladın biz burada rahat şəkildə oğurluq edə bilək deyə mübarizə aparır”.

Roman Baqdasaryan əlavə edib ki, separatçılar uzun illər ərzində Qarabağda ələ keçirdikləri var-dövlətlə Rusiyanın böyük şəhərlərində hotellər açıb, biznesə sahibləniblər. Onlardan təkcə Araik Arutyunyanın Ermənistanda və xaricdə xeyli mülkü var. Rusiyanın Stavropolsk vilayətində ona məxsus böyük hotellər şəbəkəsi mövcuddur.